PVC prozori ne traže farbanje, ali nisu ni potpuno bez brige. Evo šta, čime i koliko često, i šta nikako ne raditi.

Jedan od glavnih razloga zašto ljudi biraju PVC je to što nema brušenja i farbanja. To je tačno. Ali „bez održavanja” ne znači „bez ikakve pažnje”, nekoliko sitnica godišnje čini razliku između prozora koji poslije petnaest godina radi kao nov i prozora koji škripi, zapinje i propušta.

Odmah poslije ugradnje: skinite zaštitnu foliju

Novi profili dolaze sa zaštitnom folijom. Skinite je čim se završe radovi oko prozora. Na primorskom suncu folija se za nekoliko sedmica „zapeče” za ram i poslije se skida teško, u komadićima.

Ram i staklo

Prašina i tragovi kiše sa rama skidaju se mekom krpom i blagim deterdžentom razblaženim u vodi. Staklo perite čistom toplom vodom i krpom za staklo, ništa više nije potrebno.

Ako vam prozori gledaju na more, isperite ih običnom vodom nekoliko puta godišnje. So koju vjetar nanese ne oštećuje PVC, ali se lijepi za zaptivke i okov i vremenom otežava otvaranje.

Šta nikako ne koristiti

  • sredstva sa rastvaračima, aceton, razređivač, benzin;
  • abrazivna sredstva i praškove za ribanje;
  • žičane četke, grube sunđere, oštre predmete i strugalice.

Sve ovo ostavlja ogrebotine ili mat fleke koje se više ne mogu popraviti.

Okov: kap ulja jednom godišnje

Najmanje jednom godišnje stavite po kap ulja na pokretne djelove okova, tamo gdje se djelovi okova taru jedan o drugi, i na zatvarače na krilu. Zatim nekoliko puta otvorite i zatvorite prozor da se ulje rasporedi. Višak obrišite.

Zaptivke

Gume oko krila obrišite vlažnom krpom i jednom godišnje premažite sredstvom na bazi silikona. Tako ostaju mekane, dobro dihtuju i ne lijepe se za ram.

Ne zaboravite drenažne otvore

Na donjem dijelu rama nalaze se mali otvori kroz koje voda izlazi napolje. Ako se zapuše prašinom ili lišćem, voda ostaje u profilu. Provjerite ih kad perete prozore i očistite ih čačkalicom.

Kada pozvati majstora

Ako krilo zapinje, teško se zaključava ili odjednom propušta vazduh, ne otvarajte ga na silu. U većini slučajeva okov se samo podesi, posao od nekoliko minuta za nekoga ko zna šta radi. Javite nam se i dogovorićemo servis.